Kórdrengir unnu sterkan sigur í Lengjudeild karla í dag er liðið mætti Þrótt Reykjavík í frestuðum leik.

Þessi leikur átti upprunarlega að fara fram í gær en vegna veðurs þá var honum frestað til dagsins í dag.

Þróttur byrjaði betur í dag og komst yfir með marki frá Daða Bergssyni á 40. mínútu fyrri hálfleiks.

Sú forysta entist í þrjár mínútur en Nathan Dale jafnaði svo metin fyrir Kórdrengina með stórkostlegu marki.

„VÁÁAÁÁÁ NATHAAAN!!!!Boltinn berst á Nathan upp úr nánast engu og Nathan smellir boltanum af 25 metrunum beint upp í samúel nær!!" skrifar Anton Freyr Jónsson í beinni textalýsingu Fótbolta.net.

Sigurmarkið skoraði svo Connor Mark Simpson fyrir Kórdrengi á 77. mínútu en hann skoraði þá með skalla til að tryggja stigin þrjú.

Kórdrengir eru nú með sjö stig eftir fyrstu fjórar umferðirnar en Þróttarar með aðeins þrjú í 10. sæti deildarinnar.