Þorsteinn Halldórsson, þjálfari íslenska kvennalandsliðsins, ræddi við Fótbolta.net eftir sigur liðsins gegn Póllandi í æfingaleik í dag. Ísland lenti undir í leiknum undir lok fyrri hálfleiks en svaraði með þremur mörkum í seinni hállfeik.
Steini var ánægður með sigurinn og sérstaklega seinni hálfleikinn.
Steini var ánægður með sigurinn og sérstaklega seinni hálfleikinn.
Lestu um leikinn: Pólland 1 - 3 Ísland
„Við byrjuðum þetta ágætlega, svona fyrstu tíu-fimmtán mínúturnar, svo slitnaði svolítið á milli hjá okkur, áttum í erfiðleikum með að spila í gegn og halda aðeins í boltann. Seinni hálfleikur fannst mér bara flottur og er heilt yfir mjög sáttur með hann. Ég er bara ánægður með að fara í gegnum leikinn svona, þurftum að koma til baka eftir að lenda undir sem er prófraun og annað. Það er bara margt jákvætt við þetta."
„Við vorum stundum að reyna of flókna hluti og erfiðar sendingar. Vorum kannski ekki alveg nógu þolinmóð í að spila boltanum og finna möguleikana. Við vorum alltaf að reyna í fyrsta tempói og hefðum getað verið aðeins yfirvegaðari á boltanum. Heilt yfir fannst mér það vera vandamálið sem við vorum að glíma við á þessum kafla í fyrri hálfleik."
„Mér fannst seinni hálfleikur bara kröftugur hjá okkur, byrjuðum af krafti og keyrðum yfir þær á stórum kafla í seinni hálfleik. Svo sigldum við þessu hægt og rólega heim. Þær fengu tvær hættulegar sóknir og eitt mjög gott færi í seinni hálfleik en heilt yfir var hálfleikurinn mjög jákvæður."
„Pólska liðið er gott og á sína góðu leiki. Mér fannst þær gera okkur gera erfitt fyrir, sérstaklega í fyrri hálfleik. Svo náðum við að loka vel á þær og þá voru þær í vandræðum. Við gerðum það að krafti og náðum að vinna boltann á góðum stöðum," sagði Steini.
Viðtalið í heild sinni er talsvert lengra og má sjá í heild sinni í spilaranum að ofan. Þar er Steini m.a. spurður út í valið á byrjunarliðinu í dag. Hann segir margt jákvætt við þennan leik sem er eini æfingaleikur íslenska liðsins fyrir EM. Næsti leikur liðsins er því fyrsti leikur liðsins á EM, gegn Belgíu þann 10. júlí í Manchester.
Athugasemdir