Stefán Teitur Þórðarson lagði upp bæði mörk Silkeborg sem lagði Randers að velli í dönsku úrvalsdeildinni í dag, 2-1. Freyr Alexandersson og hans menn í Lyngby töpuðu þá fyrsta leik tímabilsins er liðið mætti Horsens í B-deildinni.
Skagamaðurinn gekk til liðs við Silkeborg í október á síðasta ári og hjálpaði liðinu að komast aftur upp í úrvalsdeildina.
Hann var að spila fimmta leik sinn í úrvalsdeildinni í dag og lagði upp fyrstu tvö mörkin sín á tímabilinu.
Stefán lagði upp fyrra markið fyrir Nicklas Helenius á 26. mínútu og það síðara á 49. mínútu áður en honum var skipt af velli sex mínútum síðar.
Góður sigur Silkeborg sem er í 6. sæti með 10 stig. Kristófer Ingi Kristinsson var í byrjunarliði SonderjyskE sem gerði 2-2 jafntefli við Viborg en Kristófer fór af velli á 65. mínútu.
SonderjyskE er í 9. sæti með 5 stig.
Fyrsta tap Lyngby
Freyr Alexandersson og lærisveinar hans í Lyngby töpuðu fyrir Horsens 2-1 í B-deildinni.
Lyngby hafði unnið fimm leiki og gert eitt jafntefli fram að leiknum í dag. Horsens leiddi með tveimur mörkum í hálfleik áður en Frederik Gytkjær minnkaði muninn á 50. mínútu.
Sævar Atli Magnússon kom inná sem varamaður hjá Lyngby á 73. mínútu en Aron Sigurðarson var ónotaður varamaður hjá Horsens.
Lyngby er í 3. sæti með 16 stig en Horsens í 5. sæti með 13 stig.
Athugasemdir