Valur 1 - 1 Fram
1-0 Haukur Páll Sigurðsson ('44)
1-1 Jannik Holmsgaard Pohl ('87)
Lestu um leikinn: Valur 1 - 1 Fram
Valur tók á móti Fram í eina leik kvöldsins í Bestu deild karla og úr varð spennandi viðureign.
Fram byrjaði leikinn betur en heimamenn unnu sig inn í leikinn er tók að líða á fyrri hálfleik og skoraði Haukur Páll Sigurðsson á 44. mínútu eftir laglega fyrirgjöf frá Tryggva Hrafni Haraldssyni. Frederik Schram varði vel frá Framörum í upphafi leiks og bjargaði Valsörum nokkrum sinnum eftir leikhlé.
Í upphafi seinni hálfleiks komust Valsarar nálægt því að bæta öðru marki við en Ólafur Íshólm Ólafsson varði vel í tvígang.
Framarar fengu sín tækifæri en Frederik Schram var vel á verði í marki heimamanna og varði vel þegar þess þurfti, allt þar til á 87. mínútu þegar Jannik Holmsgaard Pohl gerði jöfnunarmark. Markið gerði hann í kjölfarið af aukaspyrnu langt utan af velli og vildu Valsarar fá dæmda rangstöðu.
Framarar reyndu að sækja sigurinn í uppbótartíma en það tókst ekki og urðu lokatölur 1-1.
Valur er í fjórða sæti eftir þetta jafntefli, fjórum stigum eftir KA sem situr í öðru sæti. Fram er áfram í neðri hlutanum, þremur stigum frá efri hlutanum þegar þrjár umferðir eru eftir fyrir úrslitakeppnina.
