Emilía Kiær Ásgeirsdóttir hefur byrjað tímabilið gríðarlega vel með Nordsjælland í dönsku deildinni.
Liðið vann 2-0 gegn AGF í dag og bætti því upp fyrir 2-0 tap gegn Fortuna Hjorring í síðustu umferð. Nordsjælland var með forystuna í hálfleik en Emilía innsiglaði sigurinn með marki þegar rúmur klukkutími var liðinn af leiknum.
Hún hefur skorað sjö mörk í jafn mörgum leikjum í deildinni á þessari leiktíð. Nordsjælland er á toppnum með 18 stig eftir sjö umferðir en Fortuna Hjorring er í 2. sæti með 17 stig.
Emma Hawkins, fyrrum leikmaður FHL, kom portúgalska liðinu Damaiense yfir gegn Maritimo í efstu deild í dag en Maritimo skoraði tvö mörk í seinni hálfleik og niðurstaðan 2-1. Þorlákur Árnason er þjálfari Damaiense.
Liðið er með þrjú stig eftir fjórar umferðir.