Íslenski landsliðsmaðurinn Arnór Ingvi Traustason er mikill aðdáandi tölvuleiksins Counter-strike. Arnór ræddi þetta í útvarpsþætti Fótbolta.net á X-inu á laugardaginn.
„Ég er búinn að spila CS síðan ég var 14 eða 15 ára," sagði Arnór Ingvi í útvarpsþættinum.
Arnór Ingvi er í stjórn í nýstofnaðri rafíþróttadeild hjá KR.
„Ég var að hjálpa Jónasi (Kristinssyni) tengdaföður mínum og fleirum. Ég þekki aðeins inn í þennan heim," sagði Arnór.
Í þættinum kom meðal annars fram að Arnór Ingvi var að spila Counter-strike þegar hann fékk skilaboðin um að hann hefði verið valinn í landsliðshópinn fyrir EM í Frakklandi árið 2016.
Arnór Ingvi var á skotskónum í gær þegar Malmö lagði AIK í næstsíðustu umferðina í sænsku úrvalsdeildinni. Malmö getur orðið meistari um næstu helgi ef topplið Djurgarden tapar gegn Norrköping í lokaumferðinni. Malmö spilar á sama tíma við Örebro.
Athugasemdir