Pólski framherjinn Robert Lewandowski skoraði sigurmark Barcelona í 1-0 sigrinum á Valencia í La Liga á Spáni í kvöld en sá er að byrja vel hjá félaginu.

Vörn Valencia gerði vel í kvöld og náði að verjast sterkri sóknarlínu Barcelona.

Lino, leikmaður Valencia, kom boltanum í netið í byrjun síðari hálfleiks en liðsfélagi hans, Marcos, handlék knöttinn í aðdragandanum og var markið dæmt af. Xavi, þjálfari Barcelona, hefur talað um að ákvarðanir hafa ekki verið að falla með liðinu en í þetta sinn gerði það svo sannarlega því þetta var ansi tæpt.

Börsungar áttu sín færi en sigurmarkið kom ekki fyrr en á þriðju mínútu í uppbótartíma. Raphinha átti sendingu fyrir sem Lewandowski náði að koma í netið.

Pólski framherjinn er með þrettán mörk í tólf deildarleikjum og alls ekki þurft tíma til að aðlagast.

Barcelona er nú á toppnum með 31 stig en Real Madrid, sem er með jafnmörg stig, á leik til góða og getur tekið toppsætið á morgun.