Jose Mourinho, stjóri Tottenham, var spurður að því á blaðamannafundi í dag hvort hann hefði tekið að sér stjórastarfið hjá Arsenal hefði það boðist honum áður en hann tók við Tottenham.
Unai Emery var rekinn frá Arsenal í morgun.
Mourinho hafði verið orðaður við Arsenal áður en hann var ráðinn til Tottenham í síðustu viku. Hann var ráðinn til Spurs degi eftir að Mauricio Pochettino var rekinn.
Svar Mourinho við spurningunni í dag var: „Ég græði ekkert á því að svara því. Ég er svo ánægður hérna að ég get ekki hugsað um möguleikann á öðru félagi. Ég myndi segja nei við hvaða félag sem er í heiminum núna."
Lærisveinar Mourinho í Tottenham munu mæta Bournemouth í ensku úrvalsdeildinni á morgun. Báðir leikir Mourinho til þessa, gegn West Ham og Olympiakos, hafa unnist.
Athugasemdir