Lestu um leikinn: Valur 2 -  1 KR

Valur lenti undir í leiknum er Kjartan Henry Finnbogason skoraði eftir átján mínútur en jöfnunarmark Patrick Pedersen undir lok fyrri hálfleiks gaf þeim mikla trú inn í þann síðari.

„Já, mér fannst þetta nú sanngjörn úrslit. Ef þú ætlar að vinna KR þá eru ákveðin grunnatriði leiksins sem þurfa að vera í lagi eins og seinni boltar og framvegis og við vorum ekki að gera það nógu vel eftir að við náðum góðum tökum á leiknum og í seinni hálfleik fyrir utan kannski uppbótartíma fannst mér eitt lið á vellinum. Létum boltann ganga vel og sköpuðum góð færi. Þetta var góð liðsframmistaða og ef þú ætlar að vinna KR þá þarftu á því að halda," sagði Heimir.

Heimir segir að jöfnunarmarkið hafi breytt miklu og gefið leikmönnum kraft inn í seinni hálfleikinn.

„Auðvitað breytti það miklu. Hjálpaði okkur mikið inn í seinni hálfleik, frábært mark og frábær fyrirgjöf hjá Birki og skalli hjá Patrick. Menn stöppuðu stálinu í hvorn annan í hálfleiknum og held að við höfum sýnt það í seinni hálfleiknum að það hjálpaði okkur."

Helgi Mikael Jónasson var á flautunni í kvöld en dómgæslan þótti á köflum umdeild. Sigurmarkið þá sérstaklega en KR-ingar vildu fá brot í aðdraganda marksins. Í staðinn hélt leikurinn áfram og var brotið á Pedersen fyrir utan teig og skoraði Jesper Juelsgård úr spyrnunni. KR-ingar vildu einnig brot í aðdraganda sigurmarksins hjá Blikum í síðustu umferð og talaði Heimir um það.

„Alls ekki. Mér fannst hann dæma vel. KR-ingarnir spiluðu við Breiðablik um daginn og það átti að vera einhver aukaspyrna í markinu sem Breiðablik skoraði. Ég horfði á þetta og það var aldrei aukaspyrna og svo á að vera aukaspyrna þarna og þarna. Hann dæmdi vel og ekki yfir neinu að kvarta," sagði Heimir.