Barcelona er komið í úrslitaleik Meistaradeildar Evrópu þrátt fyrir 2-0 tap gegn Wolfsburg á AOK-leikvanginum í dag.

Sveindís Jane Jónsdóttir var í byrjunarliði Wolfsburg en erfitt verkefni beið hennar og liðsfélaga hennar. Fyrri leiknum lauk með 5-1 sigri Börsunga og þurfti liðið því að vinna upp fjögurra marka forystu.

Eftir markalausan fyrri hálfleiks tókst Tabeu Wassmüth að ná forystunni fyrir Wolfsburg. Aukaspyrna Felicitas Rauch fór yfir vegginn og eftir darraðadans sparkaði Sveindís boltanum í leikmann Barcelona og datt boltinn fyrir Wassmüth sem skoraði.

Tólf mínútum síðar gerðu heimakonur annað mark og nú var það Jill Roord með föstu skoti eftir góðan sprett.

Wolfsburg reyndi hvað það gat til að bæta við mörkum undir lok leiks en ekkert varð úr því. Barcelona fer í úrslitaleikinn með því að vinna samanlagt, 5-3, og mætir Lyon eða Paris Saint-Germain í úrslitum.

Sveindís Jane lék allan leikinn með Wolfsburg gegn Evrópumeisturunum og fer þetta beint í reynslubankann en Wolfsburg er fyrsta liðið til að vinna Barcelona síðan í júní á síðasta ári.