„Það er frekar fúlt að fá bara eitt stig þegar upp er staðið. Kannski enn einn leikurinn í sumar þar sem maður er þokkalega sáttur með frammistöðuna en uppskeran er frekar rýr," sagði Brynjar Gauti Guðjónsson varnarmaður Stjörnunnar eftir 1 - 1 jafntefli við Fylki í Árbænum í kvöld.
Lestu um leikinn: Fylkir 1 - 1 Stjarnan
Emil Atlason fékk að líta rauða spjaldið seint í fyrri hálfleik fyrir pirringsbrot úti á miðjum velli, víðs fjarri boltanum, var Brynjar Gauti svekktur út í hann?
„Ég er ekki búinn að sjá þetta aftur en hann er voða sorry yfir þessu. Við gerum allir mistök og svo lærum við af því. Svona er þessi leikur og hann þarf að læra af þessu," sagði hann.
„Mér fannst við vera með ágæt tök á leiknum 11 á móti 11 og skorum fínt mark eftir aukaspyrnu. Þeir eru ekkert að ná að skapa á okkur og svo kemur rauða spjaldið og við föllum aftar og förum að verja markið okkar. Mér fannst við gera það mjög vel, þeir eiga eitt stangarskot en voru ekki að komast í gegnum okkur. Við hefðum samt mátt nýta tækifærin okkar betur."
Nánar er rætt við Brynjar Gauta í spilaranum að ofan. Hann segir að sér hafi liðið vel á vellinum en hann er valinn maður leiksins hjá Fótbolta.net. Hann ræðir einnig tveggja vikna pásu framundan sem hann segir kærkomna enda búið að vera erfitt líkamlega og andlega undanfarið. Hann ræðir einnig afhverju úrslitin hafa ekki verið að falla og segir það ekki tengjast því sem gerist utan vallar.
Athugasemdir