Alfons Sampsted, leikmaður íslenska landsliðsins, var mættur á æfingu liðsins í Danmörku fyrir komandi leiki í Þjóðadeildinni, en hann tjáði sig einnig stuttlega um nýju landsliðstreyjuna sem var opinberuð í dag.
Alfons tók ekki þátt í æfingu landsliðsins í dag þar sem hann var að spila með norska meistaraliðinu Bodö/Glimt í gær en hann gaf sér tíma til að ræða við Fótbolta.net á æfingunni.
Hann er gríðarlega spenntur fyrir leikjunum fjórum í júní og hefur góða tilfinningu fyrir þessu.
Fyrsti leikurinn er gegn Ísrael á fimmtudag í Tel Aviv en hann segist þó vita lítið um liðið.
„Já, leikur í gærkvöldi og ferðalag í morgun. Það er stærsti þátturinn í þessu, stýra álagi og vera eins klár og hægt er fyrir fimmtudaginn," sagði Alfons.
„Það verður spennandi. Ég verð að viðurkenna að ég veit ekki mikið um Ísrael svona sem fótboltalið. Við eigum eftir að fara í gegnum þeirra spil og niður í 'detaila' en ég hef góða tilfinningu útfrá æfingunni í dag og líður eins og það sé flott stemning í hópnum og að menn séu klárir að gefa allt fyrir landið."
Gæti litið vel út þegar allir eru komnir saman í honum
KSÍ opinberaði nýja landsliðstreyju í dag en hún verður notuð næstu tvö árin. Treyjan hefur ekki fengið neitt sérstaklega góð viðbrögð en Alfons á erfitt með að dæma hana eina og sér.
„Ég hef ekki séð hana í persónu en svona frá myndunum að dæma gæti þetta verið búningur sem lítur ótrúlega vel út þegar allir eru komnir saman í hann en það er erfitt að dæma hana eina og sér," sagði Alfons um treyjuna.
Athugasemdir