Framherjinn stóri og stæðilegi, Hólmbert Aron Friðjónsson, verður ekki með íslenska landsliðinu í landsleikjunum fjórum í júní en hann hefur ákveðið að draga sig úr hópnum. Bjarki Steinn Bjarkason kemur inn í hópinn.
Arnar Þór Viðarsson, þjálfari landsliðsins, valdi Hólmbert í upprunalega hópinn en sóknarmaðurinn hefur verið að gera ágætis mót hjá Lilleström frá því hann kom frá Holsten Kiel á láni í janúar.
Hólmbert mun ekki taka þátt í verkefninu í leikjunum gegn Ísrael, Albaníu og San Marínó, en KSÍ staðfesti þessar fregnir í dag. Liðið spilar tvívegis við Ísrael og einu sinni við Albaníu í Þjóðadeildinni og einn vináttuleik við San Marínó.
Bjarki Steinn Bjarkason mun koma inn í hópinn, en hann er á mála hjá Venezia á Ítalíu. Hann spilaði með C-deildarliðinu Catanzaro seinni hluta tímabilsins en liðið datt út í umspili um að komast í B-deildina á dögunum.
Bjarki á ekki landsleik að baki fyrir A-landsliðið en hefur spilað 10 leiki fyrir U21 árs landsliðið.
Breyting á hóp A karla
— Knattspyrnusambandið (@footballiceland) May 30, 2022
Inn: Bjarki Steinn Bjarkason
Út: Hólmbert Aron Friðjónsson#fyririsland pic.twitter.com/xCj1t0wnY8
Athugasemdir