Fylkir og Þróttur áttust við í Pepsi Max-deild kvenna í kvöld. Liðin eru á sitthvorum enda töflunnar en fyrir leikinn var Þróttur í 3. sæti og Fylkir í 9. og næst neðsta sæti deildarinnar.

Hildur Egilsdóttir kom Þrótti yfir á 24. mínútu. Fylkir fékk vítaspyrnu undir lok fyrri hálfleiks en Íris Dögg Gunnarsdóttir í marki Þróttar varði slaka spyrnu Þórhildar Þórhallsdóttur.

Helena Ósk Hálfdánardóttir náði hinsvegar að jafna metin í upphafi síðari hálfleiks og þar við sat. Íris Una Þórðardóttir leikmaður Fylkis fékk að líta sitt annað gula spjald og þar með rautt fyrir að sparka boltanum í skilti í uppbótartíma.

Fylkir er áfram í fallsæti þremur stigum frá öruggu sæti. Þróttur í 3. sæti með 26 stig.