Chelsea er að lána Ethan Ampadu aftur í Serie A eftir að hafa spilað eitt tímabil með nýliðum Venezia sem féllu aftur niður í B-deildina.
Hjá Venezia var Ampadu í leikmannahópi með Bjarka Steini Bjarkasyni og Arnóri Sigurðssyni en núna gengur hann í raðir Spezia þar sem hann verður með Mikael Agli Ellertssyni í hóp.
Ampadu er 21 árs miðvörður sem getur einnig spilað aftarlega á miðjunni og gengur til liðs við afar áhugavert lið Spezia sem er að spila þriðja tímabilið sitt í röð í efstu deild.
Spezia er með fjögur stig eftir þrjár fyrstu umferðirnar á nýju tímabili og gæti Ampadu reynst mikill liðsstyrkur.
Ampadu á tvö ár eftir af samningi sínum við Chelsea og á 36 landsleiki að baki fyrir Wales þrátt fyrir ungan aldur.
Athugasemdir