Samkvæmt upplýsingum sem Fótbolti.net hefur fengið þá eru um 2000 miðar farnir úr kerfinu hjá KSÍ fyrir þennan leik. Það talsvert mikið magn af miðum enn til.

Hægt er að kaupa miða á leikinn á tix.is með því að smella hérna. Stelpurnar eiga svo sannarlega stuðninginn skilið.

Önnur lönd að taka fram úr okkur
Það eru tveir mikilvægir leikir framundan hjá landsliðinu þar sem liðið er með örlögin í sínum höndum varðandi það að komast á HM í fyrsta sinn.

Liðið spilar við Hvíta-Rússland á föstudaginn og mætir svo Hollandi í næstu viku í það sem verður væntanlega hreinn úrslitaleikur um sæti á HM. Þar kemur jafntefli til með að duga Íslandi á HM í fyrsta sinn - ef við vinnum Hvíta-Rússland fyrst.

„Mér líst mjög vel á þessa tvo leiki. Ég átta mig á stöðunni sem við erum í og það er gríðarlega mikilvægt að byrja á því að taka sigur á föstudaginn, að við förum í góðri stöðu út til Hollands. Sá leikur er gríðarlega mikilvægur. Þetta er stórt verkefni en mjög gaman að fá að taka þátt í því," segir Arna Sif Ásgrímsdóttir, varnarmaður liðsins.

Kvennaboltinn hefur verið að vaxa mikið síðustu ár og áhorfendmet sett víða um EM. Áhuginn á Evrópumótinu í sumar var gríðarlegur og mættu til að mynda um 87 þúsund manns á úrslitaleikinn á Wembley.

„Það er gríðarlega mikilvægt að við fáum fólk á völlinn. Manni finnst öll lönd vera að taka við sér þegar kemur að áhorfi á kvennaboltanum," segir Arna Sif, en hún var mjög svekkt með mætinguna á bikarúrslitaleikinn síðasta laugardag.

„Við erum að sjá met slegin út um allan heim, en maður var frekar svekktur með mætinguna á til dæmis bikarúrslitaleikinn. Maður var að vonast til að það yrði meiri stemning og að fólk myndi koma, en svo var ekki. Önnur lönd - finnst manni - eru að taka fram úr okkur og við verðum að fara að gefa í þarna og taka þátt í þessari þróun sem á sér stað. Ég vona að við sjáum fulla stúku - helst - á föstudaginn," segir miðvörðurinn sem varð bikarmeistari með Val síðasta laugardag.

Landsliðsfyrirliðinn, Sara Björk Gunnarsdóttir, tekur undir með henni. „Ég vona að fólk komi á völlinn og styðji okkur... ég vona að við sjáum allavega eina stúku fulla - það væri alveg geggjað," sagði Sara.

Eins og áður kemur fram er þetta eini heimaleikur kvennalandsliðsins á árinu. Þetta er eina tækifærið til að sjá þær hér á landi á þessu ári. Allir á völlinn klukkan 17:30 á föstudaginn, koma svo!

Leikirnir sem eru framundan:
2. september gegn Hvíta-Rússlandi (Laugardalsvöllur)
6. september gegn Hollandi (Stadion Galgenwaard)

Sjá einnig:
Voða auðvelt að sitja heima í stofu og hafa hátt á samfélagsmiðlum