Bale, sem er 30 ára gamall, hefur spilað á Spáni síðustu sex ár en þar hefur hann unnið Meistaradeildina fjórum sinnum og spænsku deildina einu sinni.

Hann var í áhugaverðu viðtali hjá Telegraph á dögunum en hann segist mest hafa gaman af golfi. Hann veit ekki að Boris Johnson er tekinn við embætti sem forsætisráðherra Bretlandseyja og þá veit hann lítið sem ekkert um útgöngu Bretlands úr ESB.

„Ég er ekki með neitt í símanum, þannig ef vinir mínir eða umboðsmaður minn geta haft samband með eitthvað sem ég þarf að vita. Ég sé ekki þörfina til að pæla í einhverju öðru," sagði Bale.

„Ég fylgist með fréttum sem tengjast fjárhagsviðskiptum því það hefur kannski áhrif á fjárfestingar eða fjárhag minn, því þar getur allt breyst. Annars veit ég ekki 99 prósent af því sem Brexit snýst um. Ég hef ekki einu sinni hugmynd um hver er forsætisráðherra Bretlandseyja."

„Ég hef ekkert um það að segja svo ég hef ekki áhuga. Ég fylgist með golfi. Ég get sagt þér hver er besti golfarinn," sagði hann í lokin.