Zlatan lék með AC Milan á árunum 2010-2012 og varð hann Ítalíumeistari með félaginu. Hann skoraði þá 56 mörk í 85 leikjum með Milan.

Núna er Milan í vandræðum eins og síðustu ár. Liðið er í 11. sæti, með helminginn af stigafjölda toppliðsins og nágrannaliðsins Inter.

„Ibra, á sama hvaða aldri hann er, mun alltaf vera hjá toppfélagi og Milan, jafnvel í dag, er það," sagði Ekdal, sem spilaði með Zlatan í sænska landsliðinu. Ekdal er í dag leikmaður Sampdoria á Ítalíu.

„Meistari eins og hann er alltaf góður fyrir hvaða lið sem er, og Milan hefur gert mjög vel. Mér finnst þetta stórkostleg félagaskipti, bæði upp á það sem hann mun koma sjálfur með og líka upp á það sem hann mun fá út úr öðrum."

Ekdal hefur trú á því að Zlatan muni skipta miklu máli fyrir Milan.

„Það eru tvær ástæður fyrir því. Í fyrsta lagi þá er hann ótrúlegur atvinnumaður sem æfir alltaf af gríðarlegum krafti. Hann er alltaf í frábæru líkamlegu standi," sagði Ekdal.

„Í öðru lagi, með hann á vellinum, þá spila allir vel því það er enginn nægilega hugrakkur til að valda honum vonbrigðum. Það vill enginn valda Ibra vonbrigðum. Allir sem hafa spilað með honum vita hvað ég á við."

Zlatan gæti mætt Ekdal í fyrsta leik með Milan þann 6. janúar næstkomandi.