„Þetta var okkar slakasti leikur á árinu," sagði Ásmundur Arnarsson, þjálfari Fjölnis, eftir 3-0 tap gegn Fylki undanúrslitunum í Reykjavíkurmótinu í dag.
Lestu um leikinn: Fjölnir 0 - 3 Fylkir
„Þeir hafa staðið sig vel hingað til strákarnir, höfum átt fína leiki, en ekki í dag. Við vorum slakir í dag, við vorum að gera alltof mikið af mistökum. Leikurinn var heilt yfir frekar slakur af okkar hálfu. Engu að síður var það vafasamt víti sem hleypir þeim yfir. Okkur fannst Beggi taka boltann hreint og því ekki um víti að ræða."
„Svo kemur horn strax í framhaldinu og þeir komast í 2-0. Svo kemur annað mark upp úr horni í seinni hálfleik. Þetta hefði kannski getað þróast öðruvísi, en frammistaðan engu að síður ekki nógu góð."
Ási er mættur aftur til Fjölnis eftir að hafa þjálfað þar síðast 2011.
„Það eru örfáir hérna sem ég kannast við frá fyrri tíð. Svo eru margir ungir og efnilegir, hópurinn er að langmestu leyti samansettur af þeim. Það er uppbygging framundan í Grafarvogi. Við ætlum að reyna að gera sem best úr þessum efniviði og skoða hvaða möguleika við höfum sem styrkingar."
„Mér finnst hópurinn skemmtilegur, þetta eru flottir strákar og gaman að vinna með þá."
Þrátt fyrir að það sé uppbygging í gangi þá stefnir Fjölnir á að komast aftur upp í Pepsi-deildina.
„Þú ert ekki bara þarna til að vera með. Ef það tekst í ár þá er það frábært, en uppbygging getur tekið tíma," sagði Ási.
Viðtalið er í heild sinni hér að neðan.
Athugasemdir