Fregnir frá Ítalíu og Spáni herma að Gennaro Ivan Gattuso sé við það að taka við stjórnartaumunum hjá Valencia í spænska boltanum.
Gattuso er farinn til Singapúr með umboðsmanni sínum Jorge Mendes til að ræða við Peter Lim, eiganda Valencia.
Valencia hefur gengið í gegnum erfið ár með Lim sem eiganda og eru stuðningsmenn félagsins gríðarlega ósáttir með hann.
Félaginu hefur þó tekist að halda sér í efstu deild spænska boltans en fyrir tíð Lim og á hans fyrstu árum var Valencia ávalt viðloðið Evrópubaráttu. Valencia endaði í níunda sæti spænsku deildarinnar í ár eftir að hafa lent í þrettánda sæti í fyrra.
Til gamans má geta að Peter Lim á stóran hluta í Salford City á Englandi sem er rekið með miklu tapi. Hann réði Gary Neville til Valencia á sínum tíma.
