Aston Villa, Bayer Leverkusen, Lazio og Lyon eru meðal þeirra liða sem hafa áhuga á því að fá íslenska landsliðsbakvörðinn Alfons Sampsted í sumarglugganum en tyrkneski blaðamaðurinn Ekrem Konur segir frá þessu í dag.
Alfons, sem er 24 ára gamall, hefur átt mikinn þátt í uppgangi Bodö/Glimt síðustu ár en hann kom til félagsins frá Norrköping fyrir tveimur árum.
Noregsmeistararnir komust alla leið í 8-liða úrslit Sambandsdeildar Evrópu á síðasta tímabili þar sem liðið vann meðal annars Roma tvisvar í keppninni, einu sinni í riðlakeppninni er liðið kjöldró ítalska liðið 6-1 í Noregi og þá vannst 2-1 sigur í 8-liða úrslitunum.
Alfons hefur spilað feykivel með norska liðinu, en hann verður samningslaus í lok árs og hefur sagt að hann sé opinn fyrir því að skoða tilboð frá öðrum félögum.
Tyrkneski blaðamaðurinn Ekrem Konur segir frá því í dag að enska úrvalsdeildarfélagið Aston Villa hafi áhuga á að fá hann. Steven Gerrard er stjóri Villa en Bayer Leverkusen í Þýskalandi, Lazio á Ítalíu og Lyon í Frakklandi eru einnig áhugasöm.
Alfons á 13 A-landsleiki fyrir Íslands hönd en hann tók við hægri bakvarðarstöðunni af Birki Má Sævarssyni sem lagði landsliðsskóna á hilluna á síðasta ári.
🚨 EXCL •Lazio, Aston Villa, Lyon and Leverkusen are interested in Alfons Sampsted, the 24-year-old right-back from FK Bodø/Glimt.🇮🇸 🟡 #Glimt
— Ekrem KONUR (@Ekremkonur) July 31, 2022
🔵#SSLazio 🔵#AVFC ⚪#OL 🔴#Bayer04 pic.twitter.com/fJJNPYaN6u
Athugasemdir