Forréttindi að fá að spila svona stóra leiki
Í kvöld fer fram viðureign Breiðabliks og Víkings í undanúrslitum Mjólkurbikarsins. Leikurinn fer fram á Kópavogsvelli og hefst klukkan 19:45.
Óskar Hrafn Þorvaldsson, þjálfari Breiðabliks, var til viðtals eftir leik Breiðabliks gegn Leikni á sunnudag. Þar var hann spurður út í leikinn gegn Víkingi.
Óskar Hrafn Þorvaldsson, þjálfari Breiðabliks, var til viðtals eftir leik Breiðabliks gegn Leikni á sunnudag. Þar var hann spurður út í leikinn gegn Víkingi.
„Það er hörkuleikur í bikarnum. Við erum hrikalega vel stemmdir, við hlökkum til að fá þá aftur hérna í heimsókn og búumst við hörkuleik. Auðvitað er bara frábært og gaman að spila á móti Víkingum. Það er mikil tilhlökkun og ég veit að drengirnir átta sig á því að það eru forréttindi að fá að spila svona stóra leiki á þessum tímapunkti, og alla þessa leiki sem skipta máli. Það er bara geggjað," sagði Óskar.
Liðin mættust fyrir tveimur vikum í Bestu deildinni og þá urðu lokatölur 1-1.
„Skýrslan um Víkinga tekur breytingum frá síðasta leik, við lærðum fullt á leiknum síðast og komum vonandi beittari, brattari og betri í þennan leik heldur en við vorum þá - þó að úrslitin hafi verið ágæt og spilamennskan allt í lagi. Mér fannst við eiga dálítið inni þannig vonandi verðum við ennþá sterkari í þessum leik," sagði þjálfarinn.
Einnig var rætt við Davíð Ingvarsson, leikmann Breiðabliks, eftir leikinn gegn Leikni.
„Leikur við Víking, við verðum alltaf mjög gíraðir í þá leiki. Við ætlum að koma til leiks eins og í fyrri hálfleik í síðasta leik gegn þeim. Við vorum góðir og vorum harðir og það gekk vel. Við ætlum að reyna gera enn betur, vinna leikinn og fara í úrslit."
„Við ætlum að reyna gera mjög svipað og skerpa á hlutum sem við þurfum að bæta frá því í þeim leik. Ætlum okkur að klára þá. Ég held að það sé mjög augljóst," sagði Davíð þegar hann var spurður hvort plan Breiðabliks væri að standa uppi sem tvöfaldur meistari í haust.
Breiðablik er á toppi Bestu deildarinnar sem stendur og Víkingur er ríkjandi Íslands- og bikarmeistari. Liðin háðu mikla baráttu um Íslandsmeistaratitilinn síðasta haust og má búast við hörkuleik í kvöld.
Athugasemdir