Núna stendur yfir undankeppnin fyrir HM 2023 sem mun fara fram í Ástralíu og Nýja-Sjálandi.
Írland er í möguleika á því að komast í umspilið fyrir mótið og í tilefni af því ákvað írski fréttamiðillinn The42 að gera umfjöllun um það þegar liðið fór síðast í umspil fyrir lokakeppni stórmóts.
Þá mættu þær einmitt Íslandi í tveggja leikja einvígi. Ísland vann einvígið samanlagt 4-1 og fór í fyrsta sinn á stórmót, Evrópumótið árið 2009.
Fyrri leikurinn endaði með 1-1 jafntefli en Ísland vann seinni leikinn 3-0 á köldu kvöldi í Reykjavík.
„Seinni leikurinn átti ekki að fara fram því völlurinn var frosinn. Þær voru í einhverjum sérstökum skóm en við náðum engan veginn góðu gripi á vellinum. Einn af okkar leikmönnum fór af velli og var send beint á sjúkrahús; hún hélt að hún væri búin að brjóta báða handleggi sína þar sem hún datt svo mikið á vellinum," segir Niamh Fahey sem var í írska landsliðinu þá og er enn.
Það er ljóst að þessi leikur í Reykjavík situr enn í Írum. „UEFA sagði að leikurinn yrði að fara fram."
Áine O'Gorman, sem spilaði leikinn árið 2009, mun aldrei gleyma leiknum á Laugardalsvelli. „Völlurinn var eins og skautasvell. Þær hljóta að hafa verið á skautum því við duttum bara á hausinn. Þessi leikur átti ekki að fara fram."
Núna er möguleiki á því að Ísland og Írland mætist aftur í umspili, það er að segja ef Ísland kemst ekki beint á mótið.
Athugasemdir