Víkingur er á leið í þriðja bikarúrslitaleikinn í röð en liðið er að vinna Breiðablik, 3-0, á Kópavogsvelli.

Gestirnir fengu mark á silfurfati á 5. mínútu. Birnir Snær Ingason átti fyrirgjöf. Boltinn fór yfir Nikolaj Hansen og skoppaði í teignum þar sem Anton Ari Einarsson ýtir boltanum til hliðar og þar var Davíð Ingvarsson í baráttunni við Erling Agnarsson og varð Davíð fyrir því óláni að skila honum í eigið net.

Karl Friðleifur Gunnarsson bætti við öðru fyrir Víking þremur mínútum síðar eftir fyrirgjöf frá Pablo Punyed og þá gerði Erlingur þriðja markið á 20. mínútu.

Höskuldur Gunnlaugsson ætlaði að senda boltann til baka á Anton Ara en sendingin rataði aldrei á markvörðinn og komst Erlingur í boltann áður en hann skilaði honum örugglega í netið. Staðan 3-0 í hálfleik en hægt er að sjá öll mörkin hér fyrir neðan.