Liverpool tók á móti West Ham í síðasta leik dagsins í ensku úrvalsdeildinni og tóku gestirnir forystuna snemma leiks þegar Pablo Fornals skoraði eftir misheppnaða hreinsun Joe Gomez.

Fyrri hálfleikur var ansi bragðdaufur þar sem Hömrunum gekk vel að halda Liverpool í skefjum þar til Mohamed Salah fiskaði vítaspyrnu og skoraði svo úr henni sjálfur með skoti á mitt markið.

Liverpool var áfram með völdin á vellinum eftir leikhlé og náði að skapa sér aðeins meira heldur en í fyrri hálfleik. Á 70. mínútu komu Diogo Jota og Xherdan Shaqiri á völlinn og þá breyttist gangur leiksins.

Diogo Jota skoraði skömmu eftir innkomuna en markið ekki dæmt gilt vegna brots Sadio Mane í aðdragandanum. Skömmu síðar kom Jota knettinum aftur í netið og í þetta sinn var markið löglegt. Xherdan Shaqiri átti frábæra stungusendingu á Jota og því voru það varamennirnir sem gerðu sigurmarkið.

Hamrarnir skiptu Said Benrahma, sem kostaði 30 milljónir í haust, inn á völlinn og reyndu að blása til sóknar en komust ekki nálægt jöfnunarmarki og niðurstaðan 2-1 sigur Englandsmeistaranna.

Liverpool er á toppi úrvalsdeildarinnar með 16 stig eftir 7 leiki, þremur stigum fyrir ofan nágranna sína í Everton sem eiga leik til góða. West Ham er með 11 stig.