Chelsea er að rannsaka það hvort Timo Werner, framherji RB Leipzig, sé með klásúlu í samningnum. Þessi 23 ára framherji er með 23 mörk í 24 leikjum á tímabilinu. (Telegraph)

Samningaviðræður Tammy Abraham og Chelsea hafa siglt í strand en hann vill 180 þúsund pund í vikulaun eins og samherji hans Callum Hudson-Odoi. (Goal)

Dominic Calvert-Lewin (22), leikmaður Everton, er á óskalista Manchester United fyrir næsta sumar. (Sun)

Manchester United íhugar þá einnig að fá Gedson Fernandes, miðjumann Benfica í Portúgal. (Sky Sports)

Arsenal er á eftir Dayot Upamecano, varnarmanni RB Leipzig, en Mikel Arteta, stjóri félagsins, vill styrkja varnarlínuna í janúar. (Mirror)

Arteta gæti þó átt í erfiðleikum með að halda Pierre-Emerick Aubameyang, framherja liðsins, en hann vill fara eftir tímabilið og í félag sem spilar í Meistaradeild Evrópu. (Telegraph)

Marcos Rojo, varnarmaður Manchester United, mun leitast eftir því að fara frá félaginu í janúar. (MEN)

Liverpool er í viðræðum við Sevilla um kaup á brasilíska varnarmanninum Diego Carlos en hann er með 65 milljón punda klásúlu í samningnum. (Mirror)

Thierry Henry er talinn líklegur til að taka við Barcelona af Ernesto Valverde ef hann yfirgefur félagið á næsta ári. (Sport)

Everton er í bílstjórasætinu um kólumbíska miðjumanninn James Rodriguez hjá Real Madrid en Carlo Ancelotti, stjóri Everton, vildi ólmur fá hann til Napoli í sumar. (El Desmarque)

Norwich, Everton og QPR eru meðal þeirra liða sem fylgjast með Lawrence Shankland, framherja Dundee í Skotlandi. (Scottish Sun)

Fiorentina vill fá Patrick Cutrone, framherja Wolves, á láni út tímabilið. (Gds)

Real Madrid mun kalla Jesus Vallejo til baka frá Wolves í janúar en spænski varnarmaðurinn hefur lítið fengið að spila hjá Úlfunum. (AS)

Swansea hefur þá lagt fram lánstilboð í Rhian Brewster, framherja Liverpool, en hann hefur ekki fengið að spreyta sig mikið með þeim rauðu á tímabilinu. (Daily Mail)