Athletic Bilbao og Real Sociedad mættust í fyrri leik dagsins í La Liga deildinni á Spáni í dag. Um Baskaslag var að ræða og leikið var á San Mames Barria leikvangnum.

Sociedad er í toppbaráttunni á meðan Bilabao er um miðja deild.

Leikurinn byrjaði fjörlega og Cristian Portu kom gestunum yfir á 5. mínútu eftir undirbúning frá Mikel Oyarzabal. Staðan var 1-0 fyrir gestunum í hálfleik.

Mikill hiti var í leiknum og litu alls níu gul spjöld dagsins ljós. Fleiri mörk voru ekki skoruð en Bilbao átti ekki eina einustu tilraun á markið í leiknum.

Real Sociedad er í þriðja sæti deildarinnar á meðan Bilbao er í því tólfta.