mán 25.apr 2022
Besta lið 2. umferðar - Anton í rammanum og sautján ára í sókninni
Anton Ari átti verulega góðan leik
Adolf Daði Birgisson átti virkilega góðan leik í Breiðholti.
Mynd: Fótbolti.net - Haukur Gunnarsson
2. umferð Bestu deildarinnar er að baki og tími til kominn að opinbera úrvalslið umferðarinnar.

Breiðablik vann 1-0 útisigur gegn KR í stórleik umferðarinnar og Kópavogsliðið á þrjá leikmenn í liðinu. Anton Ari Einarsson var algjörlega frábær í markinu, Damir Muminovic öflugur í vörninni og Ísak Snær Þorvaldsson lagði upp sigurmarkið í leiknum.



Óvæntustu úrslit umferðarinnar komu á Akranesi þar sem heimamenn í ÍA unnu 3-0 sigur gegn Íslands- og bikarmeisturum Víkings. Oliver Stefánsson var geggjaður á miðsvæðinu hjá ÍA og Aron Bjarki Jósepsson stóð vaktina vel í vörninni auk þess að skora í leiknum. Jón Þór Hauksson er að sjálfsögðu þjálfari umferðarinnar.

Matthías Vilhjálmsson var meðal markaskorara FH í 4-2 sigri gegn nýliðum Fram þar sem FH-ingar skoruðu tvö mörk í blálokin. Hann var valinn maður leiksins.

Hinn sautján ára gamli Adolf Daði Birgisson var maður leiksins þegar Stjarnan vann 3-0 útisigur gegn Leikni í Breiðholti. Adolf skoraði í leiknum, líkt og Emil Atlason sem einnig er í úrvalsliðinu.

Nökkvi Þeyr Þórisson var meðal markaskorara KA sem lagði ÍBV 3-0 í Vestmannaeyjum. Hann var valinn maður leiksins en varnarmaðurinn Ívar Örn Árnason fær einnig pláss í liði umferðarinnar.

Þá er Sebastian Hedlund í liðinu eftir nauman 1-0 útisigur Vals gegn baráttuglöðum Keflvíkingum.

Dómari umferðarinnar: Ívar Orri Kristjánsson og hans menn dæmdu leik FH og Fram virkilega vel.

Sjá einnig:
Besta lið 1. umferðar