fös 13.maí 2022
Ítalía um helgina - Bikar á loft í Mílanó?
Milan getur unnið ítölsku deildina um helgina
Inter á enn möguleika en þarf að treysta á að Milan tapi stigum gegn Atalanta
Mynd: EPA
Störukeppni Mílanó-liðanna, Inter og Milan, heldur áfram um helgina er 37. umferð Seríu A fer fram.

Á morgun spilar Empoli við Salernitana. Nýliðar Salernitana þurfa stig og gæti sigur dugað til að tryggja áframhaldandi veru í deildinni.

Roma mætir Venezia á Ólympíuleikvanginum í Róm en Jose Mourinho og lærisveinar hans geta fellt Venezia. Arnór Sigurðsson er á láni hjá Venezia frá CSKA Moskvu.

Á sunnudag er svo hörku dagskrá. Napoli spilar við Albert Guðmundsson og félaga í Genoa. Napoli getur tryggt þriðja sætið en Genoa er enn að berjast fyrir lífi sínu í deildinni og situr í 19. sæti með 28 stig.

Topplið Milan mætir Atalanta á San Síró en tæpum þremur tímum síðar spilar Cagliari við Inter. Milan gæti dugað jafntefli til að vinna deildina en þá þyrfti Inter að tapa. Milan er á toppnum með 80 stig, tveimur stigum meira en Inter.

Leikir helgarinnar:

Laugardagur:
13:00 Empoli - Salernitana
16:00 Verona - Torino
16:00 Udinese - Spezia
18:45 Roma - Venezia

Sunnudagur:
10:30 Bologna - Sassuolo
13:00 Napoli - Genoa
16:00 Milan - Atalanta
18:45 Cagliari - Inter