þri 24.maí 2022
Myndir: Guy Smit lét Helga heyra það og ýtti svo við Hauki Páli
Guy í leiknum á sunnudag.
„Ari sendir á Helga Guðjóns sem tekur boltann með sér framhjá Guy Smit og hendir sér í grasið. Helgi uppsker gult fyrir dýfu!" skrifaði Ingi Snær Karlsson sem textalýsti leik Vals og Víkings á sunnudagskvöld.

Víkingurinn Ari Sigurpálsson átti sendingu inn á Helga Guðjónsson sem fór framhjá markverði Vals og fór svo í grasið. Atvikið átti sér stað á 63. mínútu og uppskar Helgi gult spjald frá Jóhanni Inga Jónssyni sem dæmdi leikinn.


„Guy fær líka spjald því hann keyrir í Helga eftir dýfuna. Mjög heimskulegt," skrifaði svo Ingi í kjölfarið.

Á myndum sem Hafliði Breiðfjörð náði að atvikinu má sjá að Guy ýtir í fyrirliða sinn Hauk Pál Sigurðsson sem kom að atvikinu. Guy var augljóslega ekki sáttur við að Helgi var að reyna krækja í vítaspyrnu.