sun 17.júl 2022
Af hverju er völlurinn í Rotherham skírður í höfuðið á New York?
Leikvangurinn í Rotherham.
Þriðji og síðasti leikur Íslands í riðlakeppni Evrópumótsins fer fram á morgun þegar leikið verður gegn Frakklandi. Þá ræðst það hvort íslenska liðið komist í útsláttarkeppnina.

Leikurinn fer fram í Rotherham, nánar tiltekið á New York leikvangnum, heimavelli Rotherham United. Kári Árnason er fyrrum leikmaður liðsins, spilaði með liðinu 2012-2015.

Rotherham borgin er ekki hátt skrifuð en leikvangurinn er tíu ára gamall, tekur 12 þúsund áhorfendur og er virkilega flottur.

Ástæðan fyrir því að leikvangurinn heitir New York völlurinn er sú að á vallarstæðinu stóð áður verksmiðja sem bjó til rauða brunahana fyrir New York borg í Bandaríkjunum.