fös 12.ágú 2022
Kostic kominn til Juventus (Staðfest) - Pellegrini fer til Frankfurt
Mynd: EPA

Filip Kostic er orðinn nýr leikmaður Juventus og miklar líkur á að félaginu takist að skrá hann í tæka tíð fyrir fyrstu umferð tímabilsins í Serie A. Juve tekur á móti Sassuolo í lokaleik umferðarinnar á mánudagskvöldið.



Kostic stóðst læknisskoðun í gær og skrifaði í kjölfarið undir þriggja ára samning.

Kostic er 29 ára gamall og leikur ýmist sem vinstri vængbakvörður eða kantmaður en getur einnig leikið hægra megin.

Hann var í lykilhlutverki er Eintracht Frankfurt vann Evrópudeildina á síðustu leiktíð og hefur í heildina komið að 97 mörkum í 171 leik fyrir félagið.

Kostic á 48 landsleiki að baki fyrir serbneska landsliðið en hefur aðeins skorað þrjú mörk í þeim og gefið níu stoðsendingar.

Juventus greiðir 16 milljónir evra fyrir Kostic og mun lána vinstri bakvörðinn Luca Pellegrini til Frankfurt í eitt ár. Pellegrini er 23 ára gamall og á leiki að baki fyrir Roma, Cagliari og Genoa auk Juventus. 

Pellegrini spilaði mikið með yngri landsliðum Ítalíu en hefur aðeins tekið þátt í einum A-landsleik.