mán 12.sep 2022
Ingvar Jóns: Klár aukaspyrna
Mynd af atvikinu.
Ingvar hefur haldið marki sínu hreinu í síðustu tveimur leikjum.
Mynd: Fótbolti.net - Hafliði Breiðfjörð

Boltinn á leiðinni.
Mynd: Víkurfréttir - JPK

„Ég upplifi þetta bara sem klára aukaspyrnu. Þetta var tekið fyrir á dómarafundi hjá okkur fyrir mót - ef leikmenn eru settir á markmann eingöngu til að hindra að ég komist út í boltann þá er það bara aukaspyrna," sagði Ingvar Jónsson, markvörður Víkings, við Fótbolta.net í dag. Víkingur vann í gær 0-3 útisigur á Keflavík í Bestu deildinni.

Viðtalið í heild má nálgast í spilaranum hér að ofan.

Keflavík kom boltanum í netið á marki Víkings í fyrri hálfleik. Markið fékk þó ekki að standa því Keflvíkingar voru dæmdir brotlegir gagnvart Ingvari. Atvikið má sjá hér að neðan.


„Þeir eru ekki einu sinni að reyna við boltann. Þó að þetta líti út fyrir að vera lítið fyrir suma þá þarf ekki mikla snertingu til að ég fái ekki mitt pláss til að vinna með. Og eitt lítið skref aftur á bak til að ýta mér inn í markið hindrar að ég komist út í boltann og það er bara aukaspyrna. Ég er alveg pottþéttur á því að ef þetta hefði gerst hinumegin á vellinum þá hefðu Keflvíkingar viljað fá aukaspyrnu. Auðvitað skil ég að þeir eru pirraðir og svekktir að fá þetta mark dæmt af sér, en frá mínu sjónarhorni er þetta bara aukaspyrna."

„Ef þetta væri löglegt þá væri þetta gert svona alls staðar í heimsfótboltanum, bara settir 3-4 leikmenn í vegg á markmanninn, honum ýtt í markið og skotið á markið úr hverri hornspyrnu."


Hvað hugsaði Ingvar þegar boltinn fór í netið?

„Auðvitað þegar boltinn fer í netið þá veit maður ekki hvort að dómarinn taki rétta ákvörðun eins og mér finnst hann klárlega hafa gert. Auðvitað hugsar maður bara að þetta hafi verið brot."

„Mér finnst dómararnir hafa gert þetta vel í sumar, maður hefur reynt að fylgjast með þessu því oftast á Íslandi - í gegnum tíðina- þá leyfa dómarar mjög mikið brot á markmanni að mínu viti. Það eru eflaust margir ósammála því en mér finnst þetta klár aukaspyrna. Það þarf oft ekki mikla snertingu til að maður eigi ekki séns í boltann. Að menn bakki og blokkeri án þess að reyna við boltann finnst mér klár aukaspyrna."


Er ástæðan fyrir þessari uppstillingu Víkings, að hafa engan varnarmann í kringum Ingvar í þessari hornspyrnu, þessar upplýsingar á dómarafundi fyrir tímabil?

„Svona stillum við upp og þrátt fyrir að lið setji menn á mig þá er það bara aukaspyrna ef þeir fara fyrir mig og blokkera mig. Mér finnst óþarfi að vera bæta við fleiri mönnum. Ef ég set fjóra varnarmenn fyrir framan mig er ég kominn með helmingi fleiri menn í kringum mig og ef ég fer í minn mann þá er það ekki aukaspyrna. Svona stillum við bara upp og það hefur gengið vel í sumar," sagði Ingvar.

Hann er í viðtalinu spurður út í toppbaráttuna, breyttan leikstíl Víkings og landsliðið.