þri 13.sep 2022
Berlusconi lét þjálfarann fara eftir fimm umferðir
Silvio Berlusconi í stúkunni.
Nýliðar Monza í ítölsku A-deildinni eru búnir að reka þjálfarann Giovanni Stroppa. Formaður og eigandi Monza er enginn annar en Silvio Berlusconi, fyrrum forsætisráðherra Ítalíu.

Framundan er leikur gegn Juventus og hefur unglingaþjálfarinn Raffaele Palladino verið hækkaður um tign og stýrir Monza í þeim leik.

Berlusconi er ekki ánægður með byrjun Monza sem er með eitt stig að loknum fimm umferðum. Þetta er fyrsta tímabil liðsins í ítölsku A-deildinni.

Berlusconi var hundóánægður með leikaðferð Stroppa í 1-1 jafntefli gegn Lecce.

Það er spurning hvort Palladino verði aðalþjálfari tímabundið eða til frambúðar. Claudio Ranieri er meðal þeirra sem hafa verið orðaðir við starfið.

Stroppa er annar þjálfarinn í ítölsku A-deildinni til að taka pokann sinn á þessu tímabili. Bologna rak Sinisa Mihajlovic og var Thiago Motta ráðinn í hans stað.