fös 16.sep 2022
Valinn í argentínska landsliðið í fyrsta sinn - „Draumur allra barna"
Thiago Almada
Thiago Almada, leikmaður Atlanta United í MLS-deildinni, er í fyrsta sinn í argentínska landsliðinu, en frammistaða hans í Bandaríkjunum hefur vakið verðskuldaða athygli.

Almada, sem er 21 árs gamall sóknartengiliður, kom til Atlanta frá Velez á síðasta ári.

Á fyrsta tímabili hans í MLS deildinni skoraði hann sex mörk og lagði upp ellefu.

Frammistaða hans hefur veirð það góð í Bandaríkjunum að Lionel Scaloni, þjálfari argentínska landsliðsins, fór að fylgjast með honum og nú hefur hann valið hann í hópinn fyrir verkefnið í þessum mánuði.

Þetta er í fyrsta sinn sem Almada er valinn í landsliðið en Argentína spilar við Hondúras og Jamaíka í lok mánaðarins.

„Augljóslega er það draumur allra barna að vera valinn í landsliðið. Þetta er uppskeran eftir allt sem ég hef gert síðan ég varð atvinnumaður og jafnvel fyrir það. Þetta er draumur allra að spila fyrir landsliðið." sagði Almada.