sun 02.okt 2022
Byrjunarlið Keflavíkur og ÍA: Patrik Johannesen snýr aftur hjá Keflavík
Patrik Johannesen
Besta deild karla rúllar aftur af stað í dag eftir landsleikjahlé. Á HS Orkuvellinum í Reykjanesbæ tekur lið Keflavíkur á móti botnliði ÍA í fyrsta leik neðri hlutadeildarinnar. Heimamenn sigla heldur lygnan sjó sitjandi í efsta sæti neðri hlutans en Skagamenn verma botnsætið og þurfa sárlega á þremur stigum að halda ætli þeir sér að halda sæti sínu í deild þeirra bestu.

Keflavík gerir þrjár breytingar á liðinu sem vann Fram fyrir um hálfum mánuði síðan. Dagur Ingi Valsson, Sindri Þór Guðmundsson og Ernir Bjarnason víkja úr byrjunarliðinu fyrir Dani Hatakka, Sindra Snæ Magnússon og Patrik Johannesen.

Skagamenn gera sömuleiðis þrjár breytingar á liðinu sem laut í lægra haldi fyrir Leikni á dögunum. Wout Droste, Hlynur Sævar Jónsson og Haukur Andri Haraldsson detta út fyrir þá Tobias Stagaard, Aron Bjarka Jósepsson og Viktor Jónsson.