sun 02.okt 2022
Noregur: Svava Rós færist nær titlinum - Lagði upp sigurmarkið
Svava Rós Guðmundsdóttir lagði upp sigurmarkið
Íslenska landsliðskonan Svava Rós Guðmundsdóttir lagði upp sigurmark Brann sem vann Stabæk, 1-0, í meistarariðli norsku úrvalsdeildarinnar í dag.

Svava, sem var í byrjunarliði Brann, lagði upp eina mark leiksins á 70. mínútu fyrir Therese Asland.

Hún fór síðan af velli á 89. mínútu leiksins en þessi sigur gerir mikið fyrir Brann.

Liðið er í efsta sæti meistarariðilsins eftir fyrri umferðina og er með 5 stiga forystu á Vålerenga sem lagði Rosenborg í dag, 2-0.

Ingibjörg Sigurðardóttir lék allan tímann fyrir Vålerenga en Selma Sól Magnúsdóttir fór af velli hjá Rosenborg eftir rúman klukkutíma.

Rosenborg er í 3. sæti meistarariðilsins með 8 stig.

Patrik Sigurður Gunnarsson, markvörður Viking, spilaði þá allan leikinn í 2-1 tapi fyrir Álasundi. Viking er í 7. sæti með 33 stig þegar sex leikir eru eftir.