þri 04.okt 2022
Klopp átti langt spjall við Nunez
Úrúgvæski sóknarmaðurinn Darwin Nunez.
Gagnrýnin á Darwin Nunez verður háværari en sóknarmaðurinn hefur bara byrjað tvo leiki fyrir Liverpool síðan hann var keyptur frá Benfica, kaupverðið getur farið upp í 85 milljónir punda.

Þessi 23 ára leikmaður byrjaði vel, skoraði gegn Manchester City í leiknum um Samfélagsskjöldinn og svo gegn Fulham í fyrstu umferð úrvalsdeildarinnar.

Hann fékk hinsvegar þriggja leikja bann fyrir rautt spjald gegn Crystal Palace og síðan hann kom aftur hefur hann verið geymdur á bekknum.

Klopp segist hafa átt gott spjall við Nunez á sunnudag til að fullvissa leikmanninn um að það væri ekkert stress þó aðlögun hans hjá félaginu hafi farið rólega af stað.

„Hann er auðvitað enn að aðlagast. Þegar nýir menn koma inn þá eru allir að tala um þá og vilja að þeir skíni strax. Stundum heppnast það en stundum ekki," segir Klopp.

„Á sunnudag spjölluðum við lengi saman, við gerðum það í gegnum Pep Lijnders (aðstoðarstjóra) því ég er ekkert að verða betri í portúgölsku! Ég sagði að við værum þolinmóðir. Það er mikilvægt í þessari stöðu að hann sé ekki áhyggjufullur."

„Liðið sjálft hefur ekki komist á flug og það gerir honum ekki auðveldara fyrir. Það er sérstaklega erfitt fyrir leikmann sem vill skora mörk. Það hefur ekki allt verið að smella eins og við vildum."