fim 06.okt 2022
Gerrard: Væri ekki til í að vera með 23 nýja leikmenn
Steven Gerrard, stjóri Aston Villa.
Steven Gerrard, stjóri Aston Villa, svaraði spurningum á fréttamannafundi í dag en Villa er að fara að mæta nýliðum Nottingham Forest á mánudaginn.

Forest er í neðsta sæti deildarinnar og talað um að sæti stjóra liðsins, Steve Cooper, sé funheitt. Gríðarlegar breytingar urðu á leikmannahópi Forest fyrir tímabilið.

„Ég væri ekki til í að vera í hans stöðu. Að fá inn 23 nýja leikmenn í einum glugga er einstakt. Ég hef aldrei orðið vitni að svona áður eða heyrt af því," segir Gerrard.

„Ég held að það sé gríðarlega erfitt og mikil áskorun. Mér finnst að Steve Cooper eigi skilið að fá tíma til að móta liðið, fá þá til að aðlagast félaginu og sínum leikstíl. Þetta tekur tíma þegar þú gerir eina eða tvær breytingar, svo ekki sé talað um 23!"

Á fundinum greindi Gerrard einnig frá því að bakvörðurinn Matty Cash sé klár í slaginn aftur eftir meiðsli og að Calum Chambers gæti einnig komið við sögu á mánudag. Ludwig Augustinsson og Lucas Digne eru hinsvegar meiddir og Leon Bailey tæpur.