mán 28.nóv 2022
Talaði um að halda tryggð fyrir mánuði síðan
Michael Beale.
Michael Beale er að hætta sem stjóri QPR til þess að taka við Rangers í Skotlandi.

Frá þessu greinir Sky Sports.

Hinn 42 ára gamli Beale er mættur á æfingasvæði Rangers til að ganga frá ráðningunni. Búist er við því að hún verði jafnvel tilkynnt í dag, mánudag.

Giovanni van Bronckhorst var á dögunum rekinn eftir eitt ár sem stjóri hjá félaginu. Rangers er níu stigum á eftir toppliði Celtic í titilbaráttunni í Skotlandi.

Beale var aðstoðarstjóri Steven Gerrard hjá Rangers í þrjú ár. Hann hjálpaði liðinu að verða skoskur meistari.

Beale tók við QPR í ensku Championship-deildinni fyrir þessa leiktíð og hefur náð eftirtektarverðum árangri. Aston Villa og Úlfarnir höfðu áhuga á því að ráða hann en hann neitaði þeirra boðum af tryggð við verkefnið hjá QPR.

QPR var að berjast á toppnum þegar hann sagði þetta en árangurinn hefur ekki verið góður upp á síðkastið. Tryggðin var ekki meiri en þetta.