fim 12.jan 2023
Vill sjá sóknarmenn hljóta meiri vernd frá dómurum
Crysensio Summerville.
Leeds heimsækir Aston Villa í ensku úrvalsdeildinni annað kvöld. Aston Villa er í ellefta sæti en Leeds í því fjórtánda, tveimur stigum fyrir ofan fallsæti.

Jesse Marsch, stjóri Leeds, greindi frá því á fréttamannafundi í morgun að Crysensio Summerville mun ekki spila næstu vikurnar.

„Ég væri til í að sjá dómara vernda sóknarleikmenn meira. Cry vonast til þess að þetta verði innan við mánuður sem hann verður frá en það eru horfurnar fyrir hann núna," segir Marsch.

Summerville meiddist eftir tæklingu frá Tom Sang, varnarmanni Cardiff City, í bikarleik á dögunum.

Leeds United er að ganga frá kaupum á sóknarmanninum Georginio Rutter frá Hoffenheim. Hann verður dýrasti leikmaður í sögu Leeds.