Baldur skoraði bæði mörk KR í 2-0 sigri á Keflavík. KR var í appelsínugulum varabúningi sínum en um er að ræða svipaða búninga og Baldur spilaði í þegar hann ólst upp í Mývatnssveit.

,,Þetta er gamli búningurinn hjá Eilífi. Við vorum alltaf í skær appelsínugulum búningum og ég er líka lang myndarlegasti maðurinn á vellinum í þessum búningi," sagði Baldur léttur.

Baldur fagnaði öðru marki sínu með því að hlaupa í átt að stúkunni og faðma Friðgeir Bergsteinsson stuðningsmann KR.

,,Friðgeir er algjör fagmaður og dyggur stuðningsmaður KR. Ef það er ástæða til að faðma einhver þá er það hann. Hann er gamall liðsfélagi minn úr Völsungi og þegar ég sá hann fremstan í flokki þá var engin spurning að faðma hann."

Baldur fagnaði mörkunum sínum gegn Keflavík þrátt fyrir að vera að skora á móti sínum gömlu liðsfélögum. Leikmenn fagna stundum ekki gegn gömlu félögunum en Baldur telur að það sé ekki rétt.

,,Ég get talað lengi um þetta. Ég hef átt margar rimmur við ákveðna stuðningsmenn Keflavíkur um þetta. Þegar ég kom fyrst 2009 fagnaði ég ekki í fyrsta leiknum sem ég skoraði í á móti Keflavík. Mér fannst það ákveðin virðing en þegar maður er búinn að sýna virðingu þá á maður að fagna."

,,Það var mikið fjölmiðlafár þegar Jónas Guðni fagnaði á öðru ári eftir að hann fór frá Keflavík í KR. Mér finnst fínt að fagna ekki fyrsta árið eða fyrst þegar maður skorar en eftir það á maður að fagna og ég trúi ekki öðru en að stuðningsmenn Keflavíkur skilji það að það er engin óvirðing. Það er bara óvirðing gagnvart stuðningsmönnum þess lið sem maður er í dag ef maður fagnar ekki. Það er gaman að skora og fagna með stuðningsmönnum sínum og liðsfélögum."

Næsti leikur KR er strax á fimmtudag þegar nýliðar Þórs koma í heimsókn í Vesturbæ.

,,Ég held að það verði mjög erfitt. Mér sýndist Þórsararnir eiga fín færi gegn FH í Pepsi-mörkunum í gær og þeir veittu þeim harða mótspyrnu. Það kemur smá uppgjöf hjá þeim þegar þeir fá á sig fyrsta markið á móti FH og kannski skiljanlega, það er erfitt að lenda undir á móti FH. Þetta verður hörkuleikur í Vesturbænum sem við klárum vonandi," sagði Baldur að lokum.

Sjá einnig:
Bestur í 1. umferð - Árni Vilhjálmsson (Breiðablik)