Stjörnumenn arfaslakir í kvöld. Fylkismenn mættu ákveðnir til leiks og gáfu ekki þumlung eftir. Garðbæingar komust aldrei í gang og Árbæingar gengu á lagið. Leiddu verðskuldað í leikhléi og sköpuðu sér aragrúa af færum. Hefðu hæglega getað skorað tvö til þrjú mörk í viðbót.

Hræðileg mistök Brynjars Gauta. Brynjar Gauti gerði varnarmistök sem eiga ekki að sjást hjá liði í efstu deild og Albert Brynjar gekk á lagið, skoraði og einfaldlega kláraði leikinn fyrir Fylkismenn.

Ekki flókið. Fylkismenn eru komnir í 8-liða úrslit en Stjörnumenn sitja eftir með sárt ennið. Eftir að hafa verið taplausir í meira ár tapa lærisveinar Rúnars Páls eins og þeir fái borgað fyrir það þessa dagana!

Jeppe Hansen átti alls ekki góðan dag í dag. Fékk nánast aldrei boltann og í þau örfáu skipti sem hann kom við knöttinn varð ekkert úr því. Var tekinn af velli í hálfleik.

Þokkalegur leikur hjá Garðari Erni. Hefði mögulega mátt dæma víti þegar Ragnar Bragi féll inni í teig en það getur líka verið að þetta hafi verið rétt hjá honum.