Bæði lið fengu mikið af færum og hættulegum sóknum í dag. Með betri færanýtingu hefði annað hvort liðið náð að stela sigrinum en niðurstaðan varð sitthvort markið eftir fast leikatriði og 1-1 jafntefli. Jöfnunarmark Fjölnis kom á lokasekúndunni, alveg eins og í fyrri leik liðanna í sumar.

Jöfnunarmarkið á 95. mínútu. Viðbótartíminn var liðinn þegar Fjölnir fékk aukaspyrnu úti á kanti. Allir leikmenn liðsins fóru inn á teig, þar á meðal markvörðurinn Þórður Ingason. Það endaði á því að Ingimundur Níels Óskarsson kom boltanum í netið gegn gömlu félögunum. Skömmu áður höfðu Fylkismenn verið komnir þrír gegn einum varnarmanni Fjölnis en fengu dæmda á sig rangstöðu. Það var mjög dýrkeypt!

Fjölnir er í 3. sætinu á markatölu en liðið hefur ekki unnið í síðustu þremur leikjum. Dýrt í toppbaráttu. Fylkismenn eru áfram í harðri botnbaráttu. Fylkir er fjórum stigum á eftir ÍBV og fimm stigum á eftir Víkingi Ólafsvík sem er næsti andstæðingur.

Albert Brynjar Ingason fékk góð færi í leiknum sem hann náði ekki að nýta. Það reyndist dýrkeypt þegar Fjölnismenn náðu að jafna.

Erlendur var með fín tök á leiknum en hins vegar er spurning hvort að leiktíminn hafi ekki verið liðinn þegar Fjölnir jafnaði.