Það vantaði ekki færin í þennan leik en markverðir beggja liða voru í miklu stuði. Á endanum var það bara eitt mark sem skildi liðin að en mörkin hefðu vel getað orðið miklu fleiri.

Alex Freyr Hilmarsson skoraði eina markið í leiknum. Hann slapp í gegn, fór framhjá Gunnari og skoraði í tómt markið. Vel klárað. Á þessum tímapunkti hélt maður að það yrði markaregn í leiknum en annað kom á daginn.

Leikurinn í dag hafði afar litla þýðingu. FH-ingar búnir að tryggja sér Íslandsmeistaratitilinn og Víkingar sigla lygnan sjó.

Það sást á leik FH-inga að leikurinn hafði litla þýðingu. Liðið er ekki vant því að gefa mörg færi á sér en varnarlega náðu menn ekki að gíra sig upp í þetta verkefni og Víkingar hefðu hæglega getað skorað fleiri mörk.

Gunnar leyfði leiknum að fljóta vel. Það komu upp nokkur umdeild atvik en ég held að Gunnar hafi haft rétt fyrir sér í þeim flestum.