Fínasta mæting í Víkina! Ekki mjög margir Suðurnesjamenn en slatti af heimamönnum. Nú styttist í að fjörið byrji!

Rétt um stundarfjórðungur í að leikurinn hefjist. Einn leikur er í gangi í þessum töluðu orðum, en FH og KA eru að gera 1-1 jafntefli í Hafnarfirðinum þar sem nú er hálfleikur.

Tveir aðrir leikir hefjast klukkan 19:15. Fjölnir og Breiðablik mætast í Grafarvoginum og ÍA fær Val í heimsókn á Skipaskaga.

Það er mikið talað um útlendinga í íslenska boltanum. Sumir þykja frábærir, aðrir miðlungs og sumir skelfilegir. Í byrjunarliði Víkings eru fjórir erlendir leikmenn og enginn á bekknum. Í liði Grindavíkur eru einnig fjórir erlendir leikmenn og einn til viðbótar á bekknum. Margir þessara útlendinga hafa nú spilað áður á Íslandi, þeir Alan Lowing og Sam Hewson voru nú einu sinni samherjar hjá Fram og bjuggu meira að segja saman. Báðir sjóaðir hér á Íslandi. Inn á milli eru ný andlit á borð við Geoffrye Castillion og Milosana tvo.

Ég verð að sjálfsögðu með annað augað á Twitter á meðan leik stendur og ég tek því fagnandi ef þið hafið eitthvað um leikinn að segja. Notið myllumerkið #fotboltinet og þá erum við að tala saman. Vel valin tíst verða birt hér í textalýsingunni, þetta er þitt tækifæri til að öðlast 15 mínútur af frægð.

Það verður að segjast að grasið í víkinni er algjörlega til fyrirmyndar. Sjaldan sem maður sér völl í svona frábæru ásigkomulagi í fyrsta heimaleik sumarsins. Það hafa heldur betur skipst á skin og skúrir undanfarnar vikur, með smá snjó inn á milli, en þeir virðast kunna þetta upp á 10 í víkinni.

Það er hlýtt og milt í Fossvoginum en einn og einn dropinn dettur úr loftinu. Kjöraðstæður til knattspyrnuiðkunar!

Það verða að teljast góðar fréttir fyrir Grindvíkinga að Andri Rúnar Bjarnason heldur sæti sínu í byrjunarliðinu. Hann fór meiddur af velli í fyrri hálfleik gegn Stjörnunni en virðist hafa náð sér í tæka tíð fyrir þennan leik. Það var alls ekkert sjálfsagt! Jafnframt gaman fyrir hann að ná þessum leik gegn sínum gömlu félögum.

Heimamenn gera engar breytingar á sínu liði frá því í 2-1 sigrinum gegn KR, enda engin ástæða til ef allir eru heilir. Grindavík gerir eina breytingu, annar markaskorarinn frá því í síðasta leik, Magnús Björgvinsson, er ekki í hóp. William Daniels kemur inn í byrjunarliðið í hans stað.

Byrjunarliðin eru komin í hús!

Nú styttist heldur betur í að byrjunarliðin detti í hús, einungis um 10 mínútur.

Nokkur spurningamerki eru á liði Grindvíkinga fyrir leik kvöldsins. Andri Rúnar Bjarnason þurfti að fara meiddur af velli gegn Stjörnunni og óvíst er með þátttöku hans í víkinni. Fyrir á meiðslalistanum voru þeir Rodrigo Gomes Mateo, Juan Ortiz Jimenez og Marinó Axel Helgason. Rodrigo ku vera næstur á blað en spurning hvort hann sé búinn að ná sér. Kemur allt í ljós á slaginu 18:15!

Óli Stefán Flóventsson, þjálfari Grindavíkur, var ekkert allt of sáttur með jöfnunarmark Stjörnunnar gegn sínum mönnum. Í viðtali sagði hann að þrjú brot hefðu átt sér stað í aðdraganda marksins.

Hvorugu þessara liða var spáð neitt sérstöku gengi í Pepsi-deildinni 2017 hér á Fótbolta.net.

Grindavík var spáð 11. sæti deildarinnar og Víkingi var spáð 8. sætinu. Grindvíkingar eru vissulega nýliðar og hafa ekki spilað í Pepsi-deildinni síðan 2012 (og verið sárt saknað) og kannski væri bara flott afrek fyrir þá að halda sér uppi. Víkingur hlýtur hins vegar að stefna á Evrópusæti hið minnsta, og byrjaði sannarlega vel á þeirri vegferð!

Annars mæli ég sterklega með því að kíkja á spárnar sem hlekkt var á hér að ofan, þar sem margt skemmtilegt kemur fram um liðin, styrkleika þeirra og veikleika.

Grindavík fór einnig vel af stað með 2-2 jafntefli á heimavelli gegn Stjörnunni í miklu óveðri, en aldrei þessu vant var ekki sól og blíða í Grindavík. Þeir gulklæddu voru þó sjálfsagt svekktir með úrslitin, enda komust þeir tvisvar yfir og Stjarnan tryggði sér stig með marki frá Daníel Laxdal á 83. mínútu! Markaskorarar Grindavíkur í leiknum voru þeir Alexander Veigar Þórarinsson og Magnús Björgvinsson, en ég spái því að mikið muni mæða á þeim í sumar.

Bæði lið byrjuðu Íslandsmótið með ágætum, sérstaklega heimamenn í Víkingi. Þeir unnu flottan sigur gegn KR í Vesturbænum í fyrstu umferðinni, 2-1, eftir að hafa lent undir snemma leiks. Það voru þeir Dofri Snorrason og Geoffrey Castillon sem skoruðu mörk Víkings í seinni hálfleiknum. Ég spái því að sá síðarnefndi verði einn af markahæstu leikmönnum sumarsins og fái viðurnefnið Hollendingurinn fljúgandi. Ég er sjálfur nokkuð viss um að ég kannist við hann úr Football Manager frá sínum tíma.

Komið þið sælir kæru lesendur og verið hjartanlega velkomnir í beina textalýsingu frá viðureign Víkings og Grindavíkur í 2. umferð Pepsi-deildarinnar. Leikurinn hefst í hinum sígræna Fossvogi á slaginu 19:15.