Þrjár breytingar hafa verið gerðar á leikmannahópi íslenska karlalandsliðsins fyrir komandi tvo vináttuleiki í janúar. Ísland mætir Gvatemala 13. janúar og Hondúras 17. janúar og fara báðir leikirnir fram á heimavelli Inter Miami í Bandaríkjunum.

Gylfi Þór Sigurðsson, Sævar Atli Magnússon og Valgeir Lunddal Friðriksson eru allir að glíma við meiðsli og geta ekki verið með, og í þeirra stað koma Birnir Snær Ingason, Jason Daði Svanþórsson og Logi Hrafn Róbertsson.

Birnir Snær, sem Fótbolti.net valdi besta leikmann Bestu deildarinnar á liðnu tímabili, og Logi Hrafn, sem lék með U19 landsliðinu í lokakeppni EM síðasta sumar, eru nýliðar í A landsliði karla. Jason Daði á að baki þrjá leiki með A landsliðinu, allt vináttuleiki sem leiknir voru á árinu 2022.

Arnór Ingvi Traustason (53) og Sverrir Ingi Ingason (46) eru með mestu landsleikjareynsluna í hópnum. Sjö í hópnum eiga ekki A-landsleik að baki; auk Birnis og Loga eru það Lukas Petersson, Anton Logi Lúðvíksson, Brynjólfur Willumsson, Eggert Aron Guðmundsson og Hlynur Freyr Karlsson.