„Vonbrigði. Við vorum mjög ánægð með fyrstu 25 mínúturnar, skoruðum gott mark og fengum skot í slá og sköpuðum svolítið af færum, sem var nú planið. Fáum svo á okkur þetta skítamark eftir fast leikatriði, sem hefur verið, því miður, að gerast svolítið undanfarið og er gríðarlega svekkjandi og náðum bara einhvern veginn ekki að koma okkur upp úr því .“ Þetta sagði Halldór Jón, þjálfari Tindastóls eftir tap gegn Þrótti í dag.
Lestu um leikinn: Þróttur R. 4 - 2 Tindastóll
Tindastóll var betri aðilinn framan af en Þróttur náði að vinna sig inn í leikinn. Hvað breyttist?„Það breytist bara einhverskonar spennustig eða andrúmsloft eða sjálfstraust eða eitthvað. Við erum búin að vera fá á okkur svolítið af mörkum eftir föst leikatriði, sem hefur ekki verið vani þessa liðs undanfarið ár. “
„Þróttur á sigurinn skilið, voru betra lið stóran hluta af leiknum kannski svona 70 mínútur voru þau betra liðið.“
Tindastóll minnkaði muninn í seinni hálfleik en fengu svo mark á sig stuttu seinna „Já aftur, eins og gerðist síðast þá beint eftir mark kemur mark, það gerðist hjá þeim í fyrri hálfleik. Þær skoruðu mark og svo annað, svo skorum við mark og svo skora þær strax eftir það. Þetta eru atriði sem við höfum verið að ræða svolítið og fara yfir, kannski er það vandamálið að við séum að ræða það of mikið.“
Viðtalið má sjá í heild sinni í spilaranum fyrir ofan.