Age Hareide á æfingu Íslands í Rotterdam í dag.
Bjarki Steinn í Rotterdam í dag.
„Hann stóð sig virkilega vel, varðist vel og kom í veg fyrir fyrirgjafirnar. Hann getur líka spilað margar stöður og hefur gert það með Venezia," sagði Age Hareide landsliðsþjálfari Íslands aðspurður um Bjarka Stein Bjarkason í leiknum gegn Englandi í fyrrakvöld.
Bjarki Steinn var óvænt í byrjunarliði Íslands sem hægri bakvörður eftir að hafa ekki verið í myndinni hjá Hareide áður.
Ísland mætir Hollandi í vináttulandsleik annað kvöld og Hareide ræddi frekar um Bjarka Stein á fréttamannafundinum í dag.
„Það er leið hans í landsliðið sem gerir þetta áhugavert," sagði hann og hélt áfram.
„Hann fór og spilaði með Foggia í Serie C á láni frá Venezia. Það vill enginn búa í Foggia! Hann komst af úr því og sneri aftur til Venezia," hélt hann áfram en glæpatíðini er há í Foggia og morðtíðni einna mest á Ítalíu.
„Hann hefur staðið sig vel og hefur haft traust þjálfarans hjá Venezia sem var að komast í Serie A. Hann er búinn að fara erfiðu leiðina og mér líkar vel við viðhorfið hans. Þegar við settum hann í byrjunarliðið á Wembley sýndi hann hvernig hugarfarið er, mér líkar vel við leikmenn með sterkan karakter."
Athugasemdir
