![Icelandair](/images/icelandair2_150x150px.png)
Stefán Teitur Þórðarson leikmaður íslenska landsliðsins var að vonum svekktur með tapið gegn Hollandi í kvöld.
Lestu um leikinn: Holland 4 - 0 Ísland
„Þeir voru ákveðnari fram á við (en England), fleiri hlaup á bakvið línurnar og fundu mikið af plássi á bakvið bakverðina, þeir eru með mjög hraða leikmenn þar sem gerðu okkur erfitt fyrir og við náðum ekki að leysa það og þeir refsa á þessu stigi," sagði Stefán Teitur.
Stefán kom inn á sem varamaður í hálfleik.
„Mér leið vel. Ég var sáttur með mína innkomu sérstaklega á boltann. Ég var óhræddur að fá hann og reyna að finna spil en eins og allt liðið þá eigum við að gera betur í skyndisóknum," sagði Stefán Teitur.
Hann átti bestu tilraun íslenska liðsins þegar skot hans af löngu færi fór í stöngina.
„Ég var að skoða það, hann tekur hann með litla puttanum. Ég er búinn að gera þetta mikið í Superligunni. Þetta var fínt skot en ég var óheppinn," sagði Stefán Teitur.
Stefán var ánægður með þessa tvo leiki gegn Englandi og Hollaandi.
„Þetta var flottur gluggi heilt yfir. Frábær sigur á Englandi og margir spilkaflar hér sem voru flottir. Við tökum allt það góða með okkur, það er klárt að við séum að taka skrefið í rétta átt."